Azərbaycan güləşçisi Eldəniz Əzizli ciddi zədə alıb. "NewsCafe" xəbər verir ki, bu barədə "Report"a 28 yaşlı Avropa və dünya çempionunun özü məlumat verib. Əzizli İtaliyanın paytaxtı Romada keçirilmiş qitə çempionatında xəsarət aldığını bildirib. Güləşçi bir qabırğasının sındığını, ikisinin isə əzildiyini vurğulayıb. Avropa və dünya çempionu olan idmançı bir aydan sonra tam olaraq məşqlərə başlaya biləcəyini söyləyib: "Böyük ehtimalla, Avropa Olimpiya Təsnifat Turnirinə qatıla bilməyəcəyəm. Dünya Olimpiya Təsnifat turnirinə kimi isə tam hazır olaram".
Qeyd edək ki, Eldəniz Əzizli 2018-ci ildə Macarıstanın paytaxtı Budapeştdəki dünya çempionatında və Rusiyanın Kaspiysk şəhərindəki Avropa çempionatında qızıl medal qazanıb. Dünya Güləş Birliyi Avropa və Dünya Olimpiya Təsnifat turnirinin təxirə salındığını açıqlayıb. Yarışlar müvafiq olaraq mayın ortasına və iyuna nəzərdə tutulub.
