2021-ci ildə Azərbaycan Dövlət Neft Şirkətinin (SOCAR) müstəqil şəkildə və ya əsas payçı qismində istismar etdiyi yataqlarda 7,9 milyon ton neft, 7,9 milyard kubmetr təbii qaz hasil olunub.Bu barədə “NewsCafe”yə SOCAR-ın ötənilki əsas istehsalat göstəricilərinə istinadən xəbər verir.
Məlumata görə, 2020-ci illə müqayisədə neft hasilatı 6,5 %, qaz hasilatı isə 7 % artıb.
Ölkə üzrə ümumi neft və qaz hasilatında da artım tendensiyası davam edib. Bu, özünü qaz hasilatında xüsusilə qabarıq göstərib. Belə ki, illik müqayisədə qaz hasilatı 18,1% artaraq, 43,9 milyard kubmetrə çatıb. İl ərzində Azərbaycanda cüzi artımla 34,6 milyon ton xam neft də hasil edilib.
Neft hasilatında cüzi artım əsasən OPEC+ razılaşması çərçivəsində könüllü məhdudlaşdırmaların tədricən aradan qaldırılması ilə bağlıdır.
