Azərbaycan Respublikasinin Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin elan etdiyi açıq tenderlərin qalibi "Parlaq Məkan" MMC olub.
“NewsCafe” xəbər verir ki, qalib təşkilat bir il müddətində Şamaxı və Tovuzdakı regional “ASAN xidmət” mərkəzlərində gündəlik təmizlik işlərinin görülməsini həyata keçirəcək.
Tender şərtlərində tender təklifi verən şirkətin bu sahədə ən azı 3 il təcrübəsi olması tələb olunur.
Məlumata görə, Dövlət Agentliyi qalib təşkilata bu işi Şamaxıda görməsi üçün 206 628 manat, Tovuzda yerinə yetirməsinə görə isə 218 964 manat ödəyəcək. Ümumilikdə isə hər iki müsabiqənin qalibi olan "Parlaq Məkan"a 425 592 manat ödənməsi nəzərdə tutulur.
Xatırladaq ki, "Parlaq Məkan" MMC 2016-cı ilin noyabrın 7-də dövlət qeydiyyatına alınıb. Nizamnamə kapitalı 10 manat olan təşkilatın qanuni təmsilçisi Əvəz İsmayil oğlu Qurbanovdur.